قومي اسيمبلي ۾ مشرف جي استعيفيٰ تي بحث، شيم شيم جا نعرا،

 ميمبرن طرفان 58 ٽو بي جي خاتمي ۽ جج بحال ڪرڻ جي گهر

اسلام آباد (بيورو رپورٽ) قومي اسيمبلي ۾ حڪمران اتحاد جي ميمبرن ۽ فاٽا مان چونڊيل ايم اين ايز اڳوڻي جنرل پرويز مشرف کي گرفتار ڪري ڦاسي ڏيڻ جو مطالبو  ڪيو آهي ۽ چيو آهي ته ڇا ڦاسي رڳو سياستدانن جي مقدر ۾ لکيل آهي. جڏهن ته اپوزيشن توڙي حڪومتي ميمبرن 58 ٽو بي جي خاتمي ۽ جج جلد بحال ڪرڻ جو مطالبو ڪيو آهي. ڪالهه پارليامينٽ هائوس ۾ قومي اسيمبلي جو اجلاس ڊپٽي اسپيڪر فيصل ڪريم ڪنڊي جي صدارت هيٺ شروع ٿيو، ڌيان ڇڪايو نوٽيس ۽ ٻيو معمول وارو بزنس اڪلائڻ کانپوءِ پرويز مشرف جي استعيفا واري معاملي تي بحث شروع ڪيو ويو، قومي اسيمبلي ۾ مشرف جي حمايت ۾ جملا استعمال ڪندڙ (ق) ليگ جي ميمبرن جي تقريرن دوران شيم شيم جا نعرا هنيا ويا، ايم ڪيو ايم ۽ قاف ليگ جي ميمبرن محترمه بينظير ڀٽو شهيد کي خراج عقيدت پيش ڪرڻ کان لاچاري ظاهر ڪري ڇڏي. بشريٰ رحمان جي تقرير تي ايوان جو ماحول گرم ٿي ويو، پيپلزپارٽي جي ميمبر منور ٽالپر بشريٰ رحمان جي تقرير ۽ ضابطيات تي لهي اچڻ تي اعتراض واريو پر ان وقت اجلاس جي صدارت ڪندڙ سيد نفيسه شاهه منور ٽالپر جو اعتراض رد ڪري ڇڏيو. بحث ۾ حصو وٺندي پيپلزپارٽي جي جمشيد دستي چيو ته جنرل مشرف کي محفوظ رستو ڏيڻ غلط آهي ان کي گرفتار ڪري ڦاسي ڏني وڃي. هن چيو ته ڇا ڦاسي رڳو سياستدانن جي مقدر ۾ آهي جنرل مشرف خدا جو نافرمان آهي ان کي ڦاسي ڏيڻ ثواب آهي. مسلم ليگ (ن) جي آفتاب شيخ چيو ته جنرل مشرف هڪ وڏي برائي هئي جنهن مان ملڪ ۽ قوم کي ڇوٽڪارو مليو آهي. قاف ليگ جي ڊاڪٽر عطيه عنايت چيو ته جنرل مشرف جا هٿ صاف آهن هو هڪ فوجي جنرل هو پر استعيفا ڏئي سياسي شهيد بڻجي ويو آهي. هن جي اهڙن جملن تي ايوان ۾ ويٺل ميمبرن شيم شيم جا نعرا هنيا. پيپلزپارٽي جي ميمبر محمود حيات خان جنرل مشرف کي ڦاسي ڏيڻ جو مطالبو ڪندي چيو ته جنرل مشرف محترمه بينظير ڀٽو جو قاتل آهي هن ايوان ۾ ويٺل سمورن ميمبرن کي چيو ته محترمه بينظير ڀٽو کي خراج عقيدت  پيش ڪرڻ لاءِ اٿي بيهو ۽ ان جي عظمت کي سلام پيش ڪيو، سمورا ميمبر اٿي بيٺا ۽ هٿ مٿي کڻي شهيد محترمه کي سلام ڪيو، ايم ڪيو ايم ۽ قاف ليگ جا ميمبر پنهنجي سيٽن تي ويٺا رهيا. ان موقعي تي قاف ليگ جي ميمبر غوث بخش مهر چيو ته بينظير ڀٽو ۽ نصرت ڀٽو تي جنرل مشرف نه پر ٻين ڪيس داخل ڪيا هئا، ايوان جي ڪارروائي مشرف جي برائي ۽ تعريف ۾ وقت ذيان ڪرڻ برابر آهي. هن چيو ته چيف جسٽس افتخار محمد چوڌري ۽ ٻين ججن کي بحال ڪيو وڃي ان معاملي تي اسان ساٿ ڏيڻ لاءِ تيار آهيون جيڪو شخص هليو وڃي هاڻي ان تي ويهي بحث ڪرڻ اجايو آهي. نواز ليگ جي حاجي پرويز خان چيو ته جن ماڻهن کي مشرف جو ڏک آهي ته اهي مهرباني ڪري مشرف سان گڏ هليا وڃن. هن چيو ته جيڪڏهن مشرف کي محفوظ رستو ڏنو ويو ته سڀاڻي وري ٻيو آمر اچي راتاهو هڻندو. مخالف ڌر جي اقليتي ميمبر اڪرم گل مسيع چيو ته حڪمرانن ۾ ٿوري به جرئت آهي ته اين آر او کي ختم ڪن. هن چيو ته هاڻي 16 ڪروڙ عوام حڪمرانن جو مواخذو ڪندي. هن جنرل مشرف کي سلوٽ ڪيو جنهن تي حڪومتي ميمبرن شيم شيم جا نعرا هنيا. فاٽا جي ميمبر ڪامران خان چيو ته جنرل مشرف کي گرفتار ڪري مٿس ڪيس هلايو وڃي هاڻي عوام جي مسئلي کي حل ڪرڻ لاءِ پارليامينٽ ۾ بحث ڪرايا وڃن. نواز ليگ جي خواجا سعد رفيق چيو ته بي رحم ۽ ظالم ڊڪٽيٽر جنرل مشرف جمهوريت آڏو گوڏا کوڙي پنهنجن خلاف ڏاڍ ۽ ڏهڪاءُ جا پهاڙ ڪيرائيندو هو، اهو جنرل ڪالهه عوام آڏو گوڏا کوڙي ويٺو. هن چيو ته مسلم ليگ (ن) مشرف کي محفوظ رستو ڏيڻ واري عمل جو حصو نه بڻجندي، جنرل مشرف جمهوريت جي رستي ۾ هڪ وڏو پٿر هيو جنهن کي هٽايو ويو آهي پر جمهوريت جي منزل اڃا پري آهي. مشرف ملڪ ۽ جمهوريت جو قاتل هو، اسان کائنس ذاتي انتقام وٺڻ نٿا چاهيون پر ڪنهن اداري کي حق ناهي ته هو مشرف کي محفوظ رستو فراهم ڪري. هن چيو ته مشرف پاڪستان مان ڀڄي ويو ته ان جي حامين کي به شرمندگي ٿيندي ان کي قانون جي ڪٽهڙي ۾ آڻي بيهاريو وڃي. هن چيو ته مشرف ڪجهه ڏينهن گالف کيڏڻ بعد اوچتو قاف ليگ جي قيادت سنڀالي پارٽي تي قبضو ڪري ان کي هاءِ جيڪ ڪري سگهي ٿو. ميان جاويد لطيف چيو ته پاڪستان ۾ سولين لاءِ الڳ ۽ دفاعي ادارن لاءِ الڳ قانون ڇو آهي، محترمه بينظير ڀٽو کي سيڪيورٽي نه ڏني وئي جڏهن ته مشرف کي بارود سان ڀريل گاڏين ذريعي حملو به ڪجهه نه ڪري سگهيو. انجنيئر شوڪت چيو ته ڪالهوڪو ڏينهن پاڪستان ۾ عيد جهڙو خوشي وارو ڏينهن هو ڇو ته قوم جو قاتل جان ڇڏي هليو ويو. انجنيئر خرم دستگير چيو ته پارليامينٽ ملڪ جا سمورا مسئلا ۽ تڪرار مسئلا حل ڪرڻ جو عزم رکي ٿي. قاف ليگ جي رياض فتيانه چيو ته صدر مواخذي کان هڪ ڏينهن استعيفا ڏئي پارليامينٽ جو هڪ مهينو ذيان ٿيڻ کان بچائي ورتو هاڻي حڪومت کي جج بحال ڪرڻ گهرجن اسان مشرف جي ڦاسي جي حق ۾ ناهيون اسان ذوالفقار علي ڀٽو جي ڦاسي کي به غلط سمجهندا آهيون. قاف ليگ جي رضا حيات چيو ته اسان پرويز مشرف جا حامي آهيون ڪالهه اسان جي هار ۽ حڪمران اتحاد جي سوڀ ٿي آهي، پيپلزپارٽي ۽ نواز ليگ کي مبارڪون ڏيان ٿو ملڪ هڪ تاريخ مان گذريو اهو دور ختم ٿي ويو هاڻي هن ملڪ جي قيادت کي ڪيل پنهنجا واعدا پورا ڪرڻ گهرجن، موجوده پارليامينٽ محترمه بينظير ڀٽو جي شهادت ۽ ان جي قرباني جي نتيجي ۾ وجود ۾ آئي آهي. صاحبزاده فضل ڪريم چيو ته مشرف پاڪستان کي آمريڪا جي ڪالوني بڻايو، دهشتگردي کي هوا ڏني، هاڻي انهي ملڪ ۾ ون مين شو جو خاتمو ٿي چڪو اهي. جيڪڏهن مشرف کي محفوظ رستو ڏنو ويو ته اهو انصاف جو قتل هوندو. جنهن بعد اجلاس کي اڄ اربع شام جو 5 وڳي تائين ملتوي ڪيو ويو.ل،ڪ