مشرف سخت فيصلا ڪرڻ جو ماهر هو، سندس کوٽ ضرور محسوس ٿيندي: بش

نيويارڪ(آن لائن) آمريڪي صدر جارج ڊبليو بش، صدارتي اميدوار بارڪ اوباما، جان مڪينن ۽ ٻين اعليٰ عهديدارن چيو آهي ته اڳوڻي صدر مشرف  جي وڃڻ سان فوري طور وڏين تبديلين جو اڃا ڪو به امڪان ناهي، تنهن هوندي به نئين حڪومت مسئلن کي ختم ڪندي، پر صدر مشرف جي آمريڪا کوٽ ضرور محسوس ڪندو، آمريڪي نائب  پرڏيهي وزير رچرڊ آرمٽچ  چيو ته اڳ ۾ مشرف تي الزام هنيا ويندا هئا، پر هاڻي سمورا الزام نئين حڪومت کي کڻڻا پوندا، ريپبليڪن  پارٽي جي صدارتي اميدوار جان مڪينن چيو ته پاڪستان سياسي طور تي هڪ مستحڪم  ملڪ ٿي رهيو آهي،   جنهن کي القاعده ۽ انتها پسندن جو خطرو آهي، هن چيو ته  مستقبل  ۾ پاڪستان سان بهتر لاڳاپا رکڻ جا خواهشمند آهيون، صدارتي اميدوار بارڪ اوباما چيو ته مون ٻه سال اڳ بش انتظاميا  کي مشرف جي پاليسي اپنائڻ بدران پاڪستان جي پاليسي اپنائڻ جو چيو هو، هن چيو ته دعا آهي ته پاڪستان جي عوام پنهنجي مسئلن تي قابو پائي سگهي، صدر بش جي ترجمان چيو آهي ته آمريڪا کي صدر مشرف جي کوٽ ضرور محسوس ٿيندي، ڇو ته هو سخت فيصلا ڪرڻ ۾ ماهر هو، هوڏانهن آمريڪي پرڏيهي وزير رچرڊ بائوچر چيو آهي ته مشرف آمريڪا سميت جتي وڃڻ چاهي وڃي سگهي ٿو، آمريڪي حڪومت کي ڪو به اعتراض ناهي، هن چيو ته دهشتگردي خلاف جنگ ۾ شامل ٿيڻ جو فيصلو مشرف خود ڪيو هو، هوڏانهن آمريڪي ماهرن واشنگٽن  تي زور ڏنو آهي ته  صدر  مشرف جي استعيفيٰ  ڏيڻ کانپوءِ دهشتگردي خلاف جنگ ۾ جمهوري حڪومت کي شامل ڪيو ويو، جنهن جا بهتر نتيجا نڪرندا، هن  جو چوڻ هو ته مشرف ٻه طرفو کيل کيڏندو رهيو، هو دهشتگردي خلاف جنگ ۾ آمريڪا جو اتحادي نه هو آمريڪي پرڏيهي وزير ڪونڊو ليزا رائيس چيو آهي ته صدر مشرف جون دهشتگردي خلاف ڏنل خدمتون ساراهه جوڳيون آهن ان تي اسين سندس ٿورائتا آهيون.(گ)