|
باقي زندگي گهر ۾ گذاريندڙ مشرف جلد سعودي عرب روانو ٿيندو، تياريون مڪمل اسلام آباد/جده (آن لائن/مانيٽرنگ ڊيسڪ) اڳوڻو صدر پرويز مشرف صدارتي ڪيمپ آفيس راولپنڊي ۾ ڪجهه ڏينهن رهڻ کانپوءِ سعودي عرب روانو ٿي ويندو، جتي عمري جي ادائيگي کانپوءِ پنهنجي مستقبل جو فيصلو ڪندو، سعودي عرب وڃڻ لاءِ تياريون مڪمل ڪيون ويون آهن، جڏهن ته ويزا پڻ ورتو ويو آهي. پرويز مشرف استعيفيٰ ڏيڻ کانپوءِ باقي زندگي پنهنجي گهر ۾ رهي گذاري رهيو آهي، هن پنهنجي خاص صلاحڪارن سان ايندڙ حڪمت عملي بابت مشاورت ڪئي آهي. ذريعن موجب اڳوڻو صدر مشرف هلندڙ هفتي جي آخر ۾ سعودي عرب روانو ٿيندو، جتي پنهنجي مستقبل بابت فيصلو ڪندو ۽ ڪجهه عرصو رهندو، سعودي عرب جي شاهي خاندان سان سندس ملاقاتون ٿيڻ جو امڪان آهي، پرويز مشرف سعودي عرب ۾ مستقل قيام نه ڪندو. ذريعن موجب هو آمريڪا يا ٻئي ڪنهن ملڪ هليو ويندو. ٻئي طرف پاڪستان ۾ مقرر سعودي عرب جي سفير علي عواد عسيري اڳوڻي صدر پرويز مشرف جي سعودي عرب منتقلي جي حوالي سان ايندڙ ميڊيا جي رپورٽن کي بي بنياد ۽ ڪوڙو قرار ڏنو آهي. سعودي عرب جي هڪ اخبار جي رپورٽ موجب سعودي سفير چيو آهي ته ميڊيا رپورٽن ۾ چيو وڃي پيو ته اسلام آباد ۾ پرويز مشرف کي کڻي وڃڻ لاءِ سعودي عرب جو جهاز تيار بيٺل آهي، جيڪا رپورٽ بلڪل بي بنياد ۽ ڪوڙ تي مشتمل آهي، سعودي عرب پاڪستان جي تحفظ، سلامتي ۽ خودمختياري چاهي ٿو، ان جي اندروني معاملن ۾ مداخلت نه ڪنداسين.01 |
||
|
