نئون صدر جمهوري هوندو ۽ ننڍن صوبن جي حقن جي ڳالهه ڪندو: شازيه مري

ڪراچي (بيورو رپورٽ) سڌ سماءَ واري صوبائي وزير شازيه مري چيو آهي ته ملڪ جو نئون صدر جمهوري هوندو، آمر نه هوندو ۽ هو ننڍن صوبن جي حقن جي ڳالهه  ڪندو، اها ڳالهه هن پنهنجي آفيس ۾ صحافين سان ڳالهائيندي ڪئي. شازيه مري چيو ته جنرل پرويز مشرف جي ايجنڊا وڙهو ۽ وڙهايو هئي، جيڪو مقصد هن پورو ڪيو، مشرف جي وڃڻ سان پاڪستان جي سياست تي سٺا اثر پوندا، سندس دور ظلم، ڏاڍ ۽ جبر جو دؤر هو، هن سنڌين خلاف توهين آميز لفظ چيا، پاڻي کان سنڌ وانجهيل رهي، سنڌ مان روينيو ڪليڪشن وڏي ملڻ جي موٽ ۾ رڳو نقصان پهچايو، عوام کي ماريو ويو، صحافين، استادن ۽ نياڻين سان ناانصافيون ڪيون ويون، مشرف عوام جو ڏوهاري آهي، ساڻس ڪهڙو سلوڪ ٿيڻ گهرجي؟ عوام فيصلو ڪري، جمهوري ماڻهو آمراڻه فيصلا مڙهڻ بدران جمهوري ۽ قانوني دائري ۾ رهي ڪم ڪندا. ٻئي طرف سڌ سماءَ واري صوبائي وزير شازيه مري بنگلاديش دوستي فورم جي لائونچنگ تقريب کي خطاب ڪندي چيو ته دنيا عالمي ڳوٺ بڻجي چڪي آهي، اهڙي صورتحال ۾ اها ئي قوم ترقي ڪري سگهندي جيڪا ٻين قومن جي تجربن مان فائدو حاصل ڪندي. هن چيو ته اسان کي بنگلاديش جي تجربن مان سبق سکڻ گهرجي، ڇو ته اسان جي ثقافت ۽ سماجي معيار هڪ جهڙو آهي ۽ دوستي فورم سان ٻنهي ملڪن جا لاڳاپا وڌيڪ مضبوط ٿيندا. بنگلاديش جي سفير ياسمين مرشد، اڪرام سهگل، انور شاهه، ثابت علي، احسن مختيار، زبير ۽ ٻين خطاب ڪيو.01-م