ڊيرا مراد جمالي مان اغوا ٿيل ٽي ايم او ۽ سب انجنيئر سوڌو 5

 ڄڻن جا گولين سان پروڻ ٿيل لاش مليا،22 ڄڻا گم

جيڪب آباد (رپورٽ:حيدر مگسي) گذريل 6 آگسٽ تي اڻ ڄاتل هٿياربندن هٿان ڊيرا مراد جمالي لڳ ڇتر ٿاڻي جي حد مان جيڪب آباد واسي ٽي ايم او ڇتر ۽ سني تحريڪ جيڪب آباد جو اڳواڻ خير محمد گهنيو جو ڀاءُ محمد بخش گهنيو، سينئر ڪلارڪ حاصل خان سرهيو  سميت گورنمينٽ ٺيڪيدار بخشو عرف شنبو ڊيرا مراد جمالي واسي، ڊرائيور شاهنواز گولو، سب انجنيئر عبدالستار ابڙو کي اغوا ڪري فرار ٿي ويا هئا، جڏهن ته اطلاع تي ٻن ڏينهن بعد مغوين جا وارث ۽ دوست 9 موٽرسائيڪلن تي سوار ٿي 22 ڄڻا پيرو کڻي هٿياربندن پويان مغوين کي بازياب ڪرائڻ لاءِ ويا ته هٿياربندن جي چنبي ۾ اچي ڦاسي پيا، جڏهن ته 14 ڏينهن گذرڻ بعد ڇتر پوليس کي گشت دوران گولو واهه لڳ ڳوٺ ماڇي ڀرسان اڳ ۾ اغوا ٿي ويل جيڪب آباد واسي ٽي ايم او ڇتر محمد بخش گهنيو، ڪلارڪ حاصل خان سرهيو، ڊيرا مراد واسي سب انجنيئر عبدالستار ابڙو، گورنمينٽ ٺيڪيدار بخشو عرف شنبو ۽ ڊرائيور شاهنواز گولو جا گولين سان پروڻ ٿيل لاش هٿ آيا، جڏهن ته هٿ آيل لاش پوليس اڻ ڄاتل ڄاڻائي ڇتر ٿاڻي تي سڃاڻپ لاءِ آندا جنهن کانپوءِ مقتول مغوين جي سڃاڻپ ٿي جنهن کانپوءِ پوليس پوسٽ مارٽم لاءِ لاش ڊيرا مراد جمالي سول اسپتال آڻي مقتولن جي وارثن کي اطلاع ڏنو جيڪي پهچي پنهنجا پنهنجا لاش سڃاڻپ ڪري گهرن ڏانهن کڻائي آيا، جڏهن ته جيڪب آباد واسي محمد بخش گهنيو ۽ سينئر ڪلارڪ حاصل خان سرهيو جا لاش ايمبولينس ذريعي گهر پهچڻ تي ڪهرام مچي ويو، سندس ڀائرن ۽ اولاد کي بيهوشي جا دورا پئجي ويا، پوري شهر ۾ سوڳوار ماحول ٿي ويو. ان سلسلي ۾ سني تحريڪ جي اڳواڻ ۽ مقتول محمد بخش گهنيو جي ڀاءُ خير محمد گهنيو صحافين کي ٻڌايو ته اسان جي ڪنهن سان به دشمني نه هئي ظالمن ظلم ڪري نيڪ ۽ ايماندار ماڻهن جو ناحق قتل ڪيو آهي. خدا تعاليٰ کين سزا ڏيندو. ياد رهي ته چار ڏينهن اڳ بلوچستان ايف سي جي اهلڪارن مغوين جي بازيابي لاءِ ڇتر واري علائقي ۾ آپريشن دوران جهنگ ۽ گهرن کي باهه ڏيڻ دوران چئن ايف سي اهلڪارن خالد حسين، نظير احمد، فرمان علي ۽ بادشاهه خان جا ساهه ٻوساٽجڻ سبب فوت ٿي ويا هئا جنهن کانپوءِ آپريشن ملتوي ڪيو ويو هو. ٻئي پاسي آخري اطلاعن تائين ڌاڙيلن جي چنبي مان ٻين مغوين کي  بازياب نه ڪرايو ويو هو ۽ نه ئي وري ڪو آپريشن ڪيو ويو آهي ۽ نه ئي حد جي ڇتر ٿاڻي تي ڪيس داخل ڪيو ويو آهي.01