ميران شاهه ۽ مينگورا ۾ ڌماڪا، هزاره جيل تباهه، 4 اهلڪارن سوڌو 9 ڄڻا مارجي ويا، سرحد ۾ ريڊ الرٽ

ميران شاهه/سوات(مانيٽرنگ ڊيسڪ) ميران شاهه ۽ سوات جي علائقي مينگورا ۾ بم ڌماڪن ۾ 6 پوليس اهلڪارن سوڌو 9 ڄڻا مارجي ويا آهن. جڏهن ته باجوڙ ۾ ايف سي قلعي تي راڪيٽ حملي سبب 8 اهلڪار سخت زخمي ٿي پيا آهن. ڌماڪي ۾ هزاره جيل مڪمل طور تي تباهه ٿي ويو، هوڏانهن اتر وزيرستان ۾ اڻ ڄاتل ماڻهن آمريڪا جي جاسوسي ڪرڻ جي الزام ۾ هڪ افغاني کي قتل ڪري ڇڏيو آهي. ان سلسلي ۾ سوات ضلعي جي هيڊڪوارٽر مينگورا ۾ ٻن ڌماڪن جي نتيجي ۾ سيڪيورٽي اهلڪارن سوڌو 6 ڄڻا مارجي ويا. مينگوره پل وٽان هڪ فوجي قافلو گذرڻ بعد هڪ ڪار گذري رهي هئي، جنهن کي پوليس روڪڻ جو اشارو ڪيو، جنهن تي ڪار ڊرائيور فرار ٿي ويو ۽ پوليس ناڪابندي ڪري سندن پيڇو ڪيو ته اوچتو ڪار ۾ زوردار ڌماڪو ٿيو، جنهن ۾ 2 سيڪيورٽي اهلڪار رياض ۽ سعيد ۽ ڪار ۾ سوار 4 ڄڻا مارجي ويا. جڏهن ته اتر وزيرستان ۾ تعلقي عمارت اندر پوليٽيڪل ايجنٽ جي آفيس ٻاهران هڪ بم ڌماڪو ٿيو، جنهن ۾ 2 ڄڻا ٿڏي تي مارجي ويا ۽ هڪ زخمي بعد ۾ دم ڏنو. جڏهن ته 2 ڄڻا زخمي ٿي پيا، جن کي ميران شاهه اسپتال داخل ڪيو ويو. اختيارين موجب مارجي ويلن ۾ هڪ بمبار ۽ هڪ پوليٽيڪل انتظاميا جو اهلڪار شامل آهي. پوليٽيڪل انتطاميا موجب ڌماڪو خميس ڏينهن شام جو 4 وڳي ڌاري ٿيو، هوڏانهن ميران شاهه ۾ مختلف چيڪ پوسٽن تي وڏي تعداد ۾ آرمي مقرر ڪئي ويئي آهي، ٻي طرف باجوڙ جي علائقي ۾ اسڪائوٽس ضلعي تي راڪيٽ حملي ۾ 8 اهلڪار زخمي ٿي پيا، هوڏانهن سرحد صوبي ۾ امن و امان برقرار رکڻ لاءِ فرنٽيئر ڪانسٽيبلري کي ريڊ الرٽ ڪيو ويو آهي ۽ ڪيترن ئي شهرن ۾ ايف سي جا اهلڪار مقرر ڪيا ويا آهن. ٻي طرف اتر وزيرستان ۾ نامعلوم هٿياربندن آمريڪا جي جاسوسي ڪرڻ جي الزام هيٺ افغاني شهري کي قتل ڪري ڇڏيو آهي، جنهن جو لاش سڃاڻپ لاءِ اسپين واڪ جي هڪ مسجد ۾ رکيو ويو آهي.