حڪومت سياسي معاملن سان گڏ مهانگائي تي به ڪنٽرول ڪري:الطاف حسين

لنڊن(پ ر) متحده قومي موومينٽ جي قائد الطاف حسين  ڊيره اسماعيل خان آپگهاتي حملي جي مذمت ڪندي چيو آهي ته حڪومت شهرين جي جان ۽ مال جي تحفظ لاءِ قدم کڻي،ڪجهه عنصر دنيا ۾ اسلام جو نالو بدنام ڪري رهيا آهن. هن چيو ته ايم ڪيو ايم ڪشميري عوام جي جائز جدوجهد جي حمايت ڪندي رهندي ۽ چاهي ٿي ته ڪشمير مسئلي جو حل عوامي خواهشن ۽ امنگن مطابق ڪيو وڃي. حڪومت کي سياسي معاملن سان گڏوگڏ مهانگائي تي ڪنٽرول ڪرڻ ۽ ٻوڏ جي تباهي ۽ ٻين مسئلن تي ڌيان ڏيڻ گهرجي. اهڙن خيالن جو اظهار پاڪستان جي 61 هين يوم آزادي جي سلسلي ۾ ايم ڪيو ايم يونٽ جي اهتمام هيٺ آسٽن يونيورسٽي گريٽ هال برمنگهم ۾ ٿيل اجتماع کي فون تي خطاب ۾ ڪيو. اجتماع ۾ پاڪستاني ۽ ڪشميري نوجوان، بزرگن ۽ عورتن وڏي انگ ۾ شرڪت ڪئي. جڏهن ته ايم ڪيو ايم جي رابطا ڪميٽي جي ميمبرن سليم شهزاد، محمد اشفاق، مصطفيٰ عزيز آبادي، ايم پي اي زرين مجيد ۽ ٻين شرڪت ڪئي. الطاف حسين چيو ته پاڪستان قائم ٿئي 61 سال گذري چڪا آهن ۽ ان وچ ۾ هڪ لک کان وڌيڪ ڪشميري بزرگ، عورتون ۽ نوجوان قتل ڪيا ويا آهن پر اڄ تائين ڪشمير مسئلو حل نه ٿي سگهيو آهي.سڀني ڪشميري عوام کي پنهنجي مفاد لاءِ استعمال ڪيو. هن چيو ته ايم ڪيو ايم جي خلاف اهو پروپگينڊا ڪيو ويو ته ايم ڪيو ايم ڪشمير خلاف آهي پر جڏهن 8 آڪٽوبر تي آزاد ڪشمير ۽ صوبي سرحد ۾ قيامت وارو زلزلو آيو ته ايم ڪيو ايم زلزلي سٽيلن جي جنهن نموني وڏي پئماني تي مددڪئي اها وسارڻ جوڳي ناهي. هن چيو ته روپئي جي قيمتن ۾ ڏينهون ڏينهن گهٽتائي ٿي رهي آهي. مهانگائي عروج تي آهي، اٽو، داليون دستياب ناهن. تيل جون قيمتون آسمان سان ڳالهيون ڪري رهيون آهن، غربت ۽ مهانگائي سبب ماڻهو آپگهات ڪري رهيا آهن. ٻئي طرف قبائلي علائقن ۽ فاٽا ۾ امن امان جي صورتحال ڳڻتي جوڳي آهي. آپگهاتي حملن ۾ بي گناهه شهري مري رهيا آهن. جڏهن ته ملڪ ۾ ٻوڏ جي تباهه ڪارين سبب لکن خاندان دربدر ٿي رهيا آهن. حڪومت کي سياسي معاملن سان گڏ مهانگائي تي ڪنٽرول ڪرڻ ۽ ٻوڏ جي تباهي ۽ ٻين مسئلن تي ڌيارڻ ڏيڻ گهرجي. هن وڌيڪ چيو ته ڪو به شخص پنهنجو ملڪ يا شهر ڇڏڻ ناهي چاهيندو پر حالات ۽ مجبوريون ان کي ٻئي ملڪ هجرت ڪرڻ تي مجبور ڪن ٿيون.