|
عورتن جي عالمي ڏهاڙي جي حوالي سان آرٽس ڪائونسل ۾ رنگا رنگي تقريب ڪراچي (بيورو رپورٽ) پاڪستان آرٽس ڪائونسل ڪراچي ۾ 10 مارچ 2010ع تي عورتن جي عالمي ڏينهن جي حوالي سان ثقافت کاتي ۽ وومين ڊولپمينٽ ڊپارٽمينٽ جي گڏيل سهڪار سان رنگارنگي تقريب جو اهتمام ڪيو ويو، جنهن ۾ ٻنهي کاتن پاران مختلف قسم جا اسٽال لڳايا ويا، هن موقعي تي ثقافت کاتي طرفان لڳايل اسٽال نمايان ۽ وڏي انگ ۾ هئڻ ڪري ماڻهن جي توجهه جو مرڪز بڻيل رهيا، هٿ جي هنرن خاص طور تي دستڪاري، جنڊي، ڪاشي ۽ ٻين هنرن جا اسٽال ايندڙ ماڻهن جو پنهنجي طرف ڌيان ڇڪائيندا رهيا، جڏهن ته ثقافت کاتي پاران گهرايل لوڪ فنڪارن جي لوڪ ڌنن تي پيش ڪيل ثقافتي رقص ماڻهن کي جهومائي ڇڏيو، جيڪو پڻ سڄو ڏينهن جاري رهيو، هن موقعي تي ٻي خاص ڳالهه سنڌي ادب، تاريخ، ٻولي ۽ ٻين انيڪ موضوعن تي ثقافت کاتي جي ڇپايل شاهڪار ڪتابن جو پڻ اسٽال لڳايو ويو، جتي اهڙي نوعيت جي موضوعن سان دلچسپي رکندڙ ماڻهن کي کاتي جي وزير سسئي پليجو جي هدايتن تي نهايت ئي رعايتي اگهن تي ڪتاب فراهم ڪيا ويا، ان موقعي تي ثقافت کاتي جو سيڪريٽري شمس جعفراڻي ۽ ڊائريڪٽر ڊاڪٽر محمد علي مانجهي پڻ موجود رهيا، ثقافت کاتي جي سيڪريٽري عورتن جي عالمي ڏهاڙي جي مناسب سان ثقافت کاتي ۽ وومين ڊولپمينٽ جي گڏيل سهڪار سان هن نوعيت جي سرگرمي کي نهايت ئي سٺو ڪوٺيو ۽ اميد ظاهر ڪئي ۽ مستقبل ۾ به گڏيل سهڪار سان اهڙي نوعيت جا پروگرام ترتيب ڏيڻ گهرجن ته جيئن ماڻهن کي ڪنهن خاص موقعي تي هڪ هنڌ گڏجڻ ۽ هڪ ٻئي کي ٻڌڻ جو موقعو فراهم ٿي سگهي. ج |
