پرويز مشرف جي وڃڻ سان عوام ۾ ڪا تبديلي نه ايندي: ممتاز ڀٽو

بدين/مٺي (نمائندن وٽان) پرويز مشرف جي وڃڻ سان عوام ۾ نه ڪا تبديلي ايندي ۽ نه ئي موجوده حڪمرانن ۾ اهڙي اهليت، قابليت ۽ صلاحيت آهي جو اهي عوام جي  مسئلن کي حل ڪري سگهن، عوام شهيد بينظير ڀٽو جي رت تي ووٽ ڏئي حڪمرانن کي اقتدار ۾ آندو ۽ موٽ ۾ انهن چئن مهينن اندر ملڪ ۾ مهانگائي، بيروزگاري ۽ غربت ۾ اضافو آڻي بدامني، ڦرلٽ، تيل ۽ بجلي جي کوٽ ۾ واڌارو ڪري ڇڏيو، اهي ڳالهيون سنڌ نيشنل فرنٽ جي سربراهه سردار ممتاز علي ڀٽو مٺي ۾ جلسي کي خطاب ۽ بدين ۾ ڀرڳڙي هائوس تي صحافين سان ڳالهائيندي ڪيو. ان موقعي تي فرنٽ جو وائيس چيئرمين الهورايه سومرو، سيڪريٽري جنرل ايوب شر، ضلعي جو صدر عبدالحامد ڀرڳڙي ۽ ٻيا موجود هئا. ممتاز ڀٽو  چيو ته هي ڦرلٽ جو دؤر آهي حڪومت انهن کي ملي آهي جيڪي ٻه ڀيرا اڳ ۾ به حڪومت هلائي نه سگهيا. وڪيلن هڪ آمر کي لوڏي ڇڏيو. حڪمران آمر سان ڊيل ڪري پوءِ ڦري ويا. عوام مشڪلاتن ۾ ڦاٿل آهي، مهانگائي عروج تي آهي. بجلي جو بحران به وڌي ويو. پاڻي به نه آهي. نواز شريف پنجاب جو قومپرست آهي سرحد ۽ بلوچستان جو عوام پنهنجي قومپرستن سان گڏ آهي پر سنڌ جو ماڻهو ستو پيو آهي. سنڌ ڌرتي تي ڌاريا بادشاهي پيا ڪن. بلاول زرداري پاڪستان آيو آهي ان تي ذميواري آهي ته هو پنهنجي ماءُ جي قاتلن جا پيرا کڻي، موجوده حڪمران اقوام متحده کان جاچ ڪرائڻ بهاني جان ڇڏائڻ جو طريقو هٿ ڪيو آهي. اقوام متحده رفيق حريري جو ڪيس 5 سالن ۾ حل نه ڪري سگهي آهي سا بينظير جي قتل جي ڇا جاچ ڪندي؟ هن بلاول زرداري کي چيو ته هو پنهنجي ناني بيگم نصرت ڀٽو کي اسان جي حوالي ڪري ته جيئن اسان سندس پرگهور ڪري سگهون، گذريل 12 سالن کان اسان کان نصرت کي لڪايو ويو آهي. ان موقعي تي فرنٽ اڳواڻ ايوب شر، ڊي سي او ٿرپارڪر پاران ممتاز ڀٽو کي رهائش لاءِ سرڪٽ هائوس ۽ پروگرام لاءِ جيمخانه ڪلب نه ڏيڻ تي ڪاوڙ جو اظهار ڪيو. 01