مشرف کي محفوظ رستو ڏنو ته سڀاڻي ٻيو مشرف جنم وٺندو: قادر مگسي

حيدرآباد(رپورٽ: مختيار برفت) سنڌ ترقي پسند پارٽي  جي چيئرمين ڊاڪٽر قادر مگسي چيو آهي ته مشرف جي استعيفيٰ قوم ۽ جدوجهد ڪندڙ ڌرين جي شاندار فتح آهي ۽ اسين جدوجهد ڪندڙ سياسي سماجي سول سوسائٽي ۽ وڪيل برادري جي ماڻهن کي مبارڪباد پيش ڪيون ٿا. هن چيو ته مشرف کي محفوظ رستو ڏنو ويو ته سڀاڻي وري ٻيو مشرف جنم وٺندو. ان ڪري مشرف تي شهيد بينظير، اڪبر بگٽي، بالاڇ مري سميت هزارين ماڻهن جي ٿيل قتل جو سڌي ريت ڪيس داخل ڪري 9 سالن جي ڦرلٽ جو اوپن ڪورٽ ۾ ڪيس هلايو وڃي. اهڙو اظهار هن ڪالهه پريس ڪلب حيدرآباد ۾ پريس ڪانفرنس کي خطاب ڪندي ڪيو. هن چيو ته مشرف تي سنگين نوعيت جا ڪيس داخل ڪيا وڃن جن ۾ دهشتگردي جو نيٽ ورڪ هلائڻ وانا ۾ ٿيل قتلام، بلوچستان جي ماڻهن جي رتوڇاڻ ملڪ کي مخصوص ملٽي نيشنل ڪمپنين وٽ وڪرو ڪرڻ سميت ٻيا پڻ سوين ڪيس موجود آهن. هن چيو ته موجوده حڪمرانن جي ڪري مشرف کي محفوظ رستو ڏنو ته تاريخ کين بخش نه ڪندي. اهو ئي سبب آهي جو ماضي ۾ راتاها هڻندڙ جنرلن کي معافيون ملنديون رهيون آهن هن چيو ته مشرف 9 سالن دوران ماڻهن کي داداگيرن وانگر پيش آيو ۽ هو هميشه ٺونشا ڏيکاري قوم کي حراسان ڪندو ويو پر تاريخ کيس آخر ۾ روئاري ڏيکاريو انڪري داداگيرن کي ان مان سبق حاصل ڪرڻ کپي. هن چيو ته ضياءَ الحق مذهب کي نقصان ڏنو ۽ مشرف جيڪو سڀ کان پهرين پاڪستان چوندو هيو ان ملڪ کي ايترو نقصان ڏنو آهي جو ايترو اسان قومپرستن به ناهي ڏنو جيڪي ملڪ جي خلاف آهيون. هن چيو ته 72 ڪلاڪن ۾ جج بحال ڪيا وڃن نه ته پ پ ۽ نواز ليگ کي جيڪو قوم جس ڏنو آهي اهو پاڻي ۾ ملي ويندو. هن چيو ته ايم ڪيو ايم سميت مشرف جي سموري باقيات کي سياست، ادارن مان فورن بي دخل ڪرڻ کپي ۽ گورنر سميت ايم ڪيو ايم جي انهن سمورن ماڻهن خلاف ڪيس داخل ڪري اوپن ڪورٽ ۾ آندا وڃن جن سنڌ جي نالي تي قتلام ڪيو ۽ حق غضب ڪري دهشتگردي آهي.م