|
روبرو روشني ”جنون ۽ جذبن کانپوءِ هاڻ انقلاب مرده آباد؟“ نسيم کوسو هن مملڪت خداداد ۾ ڇا ڇا نه پيو ٿئي ۽ ڇا ڇا نه ڪرايو وڃي ٿو؛ هتي ڄڻ ته سڀ ڪجهه ڊرامو آهي، ڊرامي جي سينن وانگي سڀ ڪجهه ڊراپ سين ٿئي پيو؛ نوان نوان اداڪار اِن ٿين پيا ۽ ڪجهه اداڪار آئوٽ ٿين ٿا، سياسي اداڪارن جون اداڪاريون ڏسون پيا ۽ سمجهون پيا، سندن مقصد به، پر هاڻي ڳالهه سياسي اداڪارن کان اڳتي وڌي وئي آهي، هاڻي سياسي اداڪارن سان گڏ سياسي گلوڪار به ميدان ۾ لهي پيا آهن، جيڪي اهو پيا ٻڌائن ته هي نئون سيٽ اپ (موجوده سياسي ڍانچو) ڪنهن ڪم جو نه آهي ۽ کيس وڃڻ کپي. پاڻ ذڪر ڪنداسين سياسي گلوڪارن جو يعني پاڪستاني پاپ اسٽارز جو، جيڪي گذريل ڏهاڪي کان هڪ خاص سرگرمي ۾ رڌل آهن ۽ انهن جي جنونيت جو به اندازو ٿي ويندو ته سندن مقصد ڇا آهن. ان ۾ ڪو شڪ نه آهي ته پاڪستان جي پاپ انڊسٽري هن وقت بلڪل مستحڪم انڊسٽري آهي، جهڙي طرح ڀارت جي فلم انڊسٽري برصغير جي سڄي فنون لطيفه، سياست ۽ معيشت تي اثر انداز ٿيندي آهي، اهڙي طرح پاڪستان جي پاپ انڊسٽري به پوئتي نه آهي. شروع ڪنداسين پاڻ تمام نئين گانن کان يعني موسٽ ريسنٽ ريليز (Most recent Release) کان. انقلاب مرده آباد هي آهي سياسي گلوڪارن جو نئون وارُ. موجوده سڀني ميوزڪ چئنلن تي تازو ئي آن ايئر ٿيندڙ هي پاپ گانو خبر نه آهي ڪنهن ٺاهيو آهي ۽ ڪنهن ٺهرايو آهي، 4 Men نالي بينڊ (هي نئون بينڊ آهي) جو هي گانو تاريخ جي سڀني نظامن ۽ اميدن کان مايوس آهي ۽ اهو چئي رهيو آهي ته هاڻ انقلاب مرده آباد آهي، انقلاب جي واٽ نه وٺو، انسان جي سڄي تاريخ گند ڪيو آهي، انساني خون کانسواءِ ڪجهه نه ٿيو آهي، هن ۾ سياسي گلوڪار ڀڳت سنگهه ۽ چي گويرا جي ڪردار ۾ سامهون اچن ٿا. هنن ٻنهي ڪردارن جي اسان وٽ تمام وڏي اهميت آهي. برصغير جي سياسي تاريخ ۾ جيڪا پهرين سياسي چڻنگ اٿي هئي، اهو هيو ڀڳت سنگهه جيڪو نوجوان هيو، اڄ تائين برصغير جو نوجوان ڀڳت سنگهه جو شيدائي آهي. ڀڳت سنگهه جي سياست مزاحمت جي تاريخ جي تمام وڏي جرئت آهي. جنهن جي مزاحمت سامراج برطانيه کي به جهڪائي ڇڏيو هيو. جنهن جيل ۾ ان ڳالهه تي به مزاحمت ڪئي هئي ته آئون سياسي قيدي آهيان ۽ مون کي سياسي قيدي طور قبول ڪيو وڃي، يعني منهنجي سياست ۽ مزاحمت کي برطانيه سرڪار تسليم ڪري. هيڏي وڏي مزاحمتي سياست کي ڪيئن نه آساني سان مسمار ڪرڻ جي ڪوسش ڪئي پئي وڃي. هي ڪير آهن، جن سياسي گلوڪارن کان اهو چورايو آهي ته ڀڳت سنگهه جي سياست ۽ ڦاهي بيڪار آهي ۽ انقلاب مرده آباد آهي؟ ساڳي گاني جو ٻيو ڪردار آهي چي گويرا، ڪيوبا جي مزاحمتي تحريڪ جو سرواڻ، کاٻي ڌر جو هيرو ۽ سرمائيداري نظام جو خاتمو چاهيندڙ. جهڙي طرح ڀڳت سنگهه نوجوانن جو مقبول هيرو آهي، ساڳي طرح چي گويرا سڄي دنيا جي نوجوانن جو آئيڊيل آهي. آمريڪا جي ڀرپور مخالفت هوندي به اڄ تائين اولهه جا نوجوان چي گويرا جون شرٽون پائي ڪلبن ۾ ناچ ۽ ڊانس ڪن ٿا. توڙي جو کين اها خبر نه آهي ته چي گويرا جي سياست ڪيوبا ۽ لاطيني آمريڪا کان وٺي پوري دنيا تي ڪهڙا نقش ڇڏيا آهن. مزاحمت جي تاريخ جو اڄ تائين هو سرواڻ آهي. دنيا اڄ به چي گويرا کي وساريو نه آهي ته پوءِ هي ڪير آهن سياسي گلوڪار جيڪي چي گويرا جي سياست کي ناڪاره ڪرڻ جو درس ڏين ٿا. چي گويرا جي ڪردارن ۽ ولي ۾ هي ڇا پيا چون؟ ان گاني ۾ چي گويرا NRO، بليڪ واٽر، ڊرون حملن ۽ وزيرستان آپريشن تي تنقيد ڪندي ڏيکاريو ويو آهي. ان نام-نهاد چي گويرا جي هيءَ تنقيد اها تنقيد آهي، جيڪا پاڪستان جي ساڄي ڌر اڄ جي لبرل ۽ سيڪيولر ڌرين تي ڪري رهي آهي، يعني چي گويرا ناخوش آهي. ڊراپ سين هن گاني جو ڊراپ سين به انتهائي اهم آهي، ڊراپ سين ۾ مڪمل تباهي ۽ بربادي نظر اچي رهي آهي، ڄڻ ڪوئي بم ڌماڪو يا آپگهاتي حملو ٿيو هجي، هڪ اينڪر پرسن (سياسي اداڪار) ڪيمرا رکي ان تباهي تي تبصرو ڪري رهيو آهي ته حڪومت پنهنجي پاليسين ۽ خودمختياري ۾ ناڪام وئي آهي، ڊرون حملن ۾ ڪيترائي معصوم شهري مارجي ويا آهن، سري نگر ۾ پاڪستاني جهنڊو ڦڙڪائڻ تي گهر مٿان هندوستاني فوج جي بمباري ٿي آهي. سوال اهو ٿو پيدا ٿئي ته هن گاني ۾ ڊرون حملن، بيلڪ واٽر، NRO سان گڏ ڪشمير ڪاز کي ڇو فوڪس ڪيو ويو آهي، هن سڄي صورتحال ۾ ڪشمير ڪاز ڪٿي ٿو فٽ ٿئي؟ هي سڀ پيرا ڪيڏانهن وڃن ٿا؟ گو صاحب جي گو هارون جو هي نئون گانو اسان کي نه صرف گو مشرف گو ياد ڏيارائي رهيو آهي پر 90 جي سياست جي ياد به تازي ڪري ڇڏي آهي، جڏهن هڪ لساني گروهه جي حمايت سان مشهور سنگر سجاد احمد ”بس ڀئي بس زياده بات نهين چيف صاحب، آج ڪي بعد ملاقات نهين چيف صاحب“ ڳايو هيو، ان گاني کي ڪراچي ۽ حيدرآباد سميت وڏن شهرن ۾ تمام گهڻي پذيرائي ملي هئي، ان گاني جو مقصد هيو ڪراچي ۾ هلندڙ ايم ڪيو ايم مٿان آپريشن بند ڪرائڻ، جڏهن نصيرالله بابر طرفان ڪراچي ۾ ايم ڪيو ايم خلاف آپريشن ٿي رهيو هيو ته ان وقت انهن ان گاني کي پنهنجي سياسي هٿيار طور استعمال ڪيو هيو. اڄ وري ملڪ جو هڪ ٻيو طبقو ساڳي حڪمت عملي استعمال ڪري رهيو آهي، جيڪو هارون جي هن نئين گاني جي صورت ۾ آهي. هارون هن گاني ۾ سڄي نظام کي تنقيد جو نشانو بڻائيندي چئي ٿو ”گو صاحب جي گو“ جنهن جي لاءِ ڪجهه ڏينهن اڳ هڪ پريس ڪانفرنس به ڪئي وئي آهي. اهو ته بلڪل به نه ٿيو آهي ته توهان ڪو گانو لانچ ڪيو ۽ ان لاءِ پريس ڪانفرنس ڪيو، آخر هارون، سندس ڊائريڪٽر ۽ سڄي ٽيم کي ان جي ضرورت ڇو پيش آئي ته هو پريس ڪانفرنس ڪن. پريس ڪانفرنس ۾ ڊائريڪٽر جو چوڻ هو ته اسان هن گاني ۾ سڌي ريت ڪنهن کي هِٽ نه ڪيو آهي، پر اسان هن نظام تي تنقيد ڪئي آهي، هن نظام کي وڃڻ کپي. جيڪڏهن اها ڳالهه آهي ته پوءِ ”گو صاحب جي گو“ ڪنهن ڏانهن اشارو آهي، ”سب بولين گو صاحب جي گو“. هي ”سڀ“ ڪير آهن ۽ ڪنهن کي چون پيا ته ”گو صاحب جي گو؟“ توهان ٿورو غور ڪيو ته گو صاحب گو ۽ ”گو مشرف گو“ ۾ توهان کي ڪا هڪجهڙائي نظر اچي رهي آهي يا نه؟ ”گو مشرف گو“ جو ڪانسيپٽ ڪٿان ڊويلپ ٿيو هيو ۽ هي ”گو صاحب گو“ جو ڪٿان ٿئي پيو؟ اها حقيقت آهي ته پاڪستاني پاپ پاڪستان جي نوجوانن ۾ تمام گهڻو مقبول آهي ۽ اثر رکندڙ به آهي ۽ اهو ئي سبب آهي جو نوجوانن کي هن دفعي ٽارگيٽ ڪيو پيو وڃي. هي مرحلو ٿورو مست آهي پر ڪافي اثر رکندڙ آهي. ڇو ته نوجوان ئي تبديلي جو محرڪ ٿيندا آهن. جنون گروپ پاڪستان جي سڄي ميوزڪ انڊسٽري بشمول هندوستان، هن گروپ کي تمام گهڻي مقبوليت ملي آهي. هي گروپ نه صرف پاڪستان پر پوري دنيا ۾ مشهور آهي. هن گروپ ”جذبه جنون“ گاني سان پنهنجو سفر شروع ڪيو ۽ برصغير جي 13 ۽ 14 صديءَ جي شاعري کان وٺي اڄ تائين جي مذهبي جنونيت واري شاعري ڳائي . توڙي جو هي گروپ اڄڪلهه ڌار (Split) ٿي چڪو آهي پر هو انفرادي طور پنهنجو ڪم ضرور ڪري رهيا آهن. تازو ئي هن گروپ جي هڪ ميمبر سلمان احمد جو ڪتاب منظرعام تي آيو آهي، سندس موضوع آهي ”راڪ اينڊ رول جهاد“ (Rock & Roll Jihad) جنهن جو مقصد سنڌي ۾ هيئن ٿيندو ”جهاد جاري رهي.“ سلمان احمد هن ڪتاب جي رونمائي وقت پريس ڪانفرنس ڪندي اهو چيو آهي ته ”جهاد اهو نه آهي جيڪو آمريڪا ۽ ملان اسان کي ٻڌائي رهيا آهن، اصل جهاد ته موسيقي جي ذريعي آهي، يعني اسلام کي هاڻي موسيقي جي ذريعي پوري دنيا ۾ ڦهلائجي.“ ياد رهي ته سلمان احمد گڏيل قومن جو Good will Ambassador به آهي، يعني سندس ڪم آهي پوري دنيا ۾ نيڪ نيتي جو پيغام پهچائڻ. سلمان احمد جي هن ڪتاب تي هڪ آمريڪي صحافي اهو لکيو ته ”هڪ هيرو افغانستان جي پهاڙن ۾ نوجوانن کي اسلام سيکاري رهيو آهي ۽ ٻيو هيرو آمريڪا ۾ ويهي نوجوانن کي موسيقي جي ذريعي اسلام سيکاري رهيو آهي.“ اها تنقيد نه صرف آمريڪي صحافي جي آهي، پر نيوياڪ ٽائيمز ۾ هڪ مڪمل اسٽوري به ڇپي هئي ته پاڪستاني پاپ سنگرز طالبان تي تنقيد بجاءِ آمريڪا تي تنقيد ڪري رهيا آهن. جنهن اسٽوري کي جيو جي پروگرام ڪيپيٽل ٽاڪ ۾ چئلينج ڪيو ويو، جنهن ۾ پاڪستاني نالي واري پاپ اسٽارز شهزاد راءِ، علي ظفر، علي عظمت ۽ ابرارالحق شرڪت ڪئي. سندن چوڻ هو ته نيويارڪ ٽائيمز جي اسٽوري بدنيتي تي ٻڌل اسٽوري آهي، جڏهن ته حقيقت ان جي برخلاف آهي. اها ڳالهه به نوٽ ڪرڻ جي آهي ته ان سڄي ٽاڪ شو ۾ ڪٿي به انهن پاپ اسٽارز طالبان ۽ آپگهاتي حملن کي نه ننديو. اها به حقيقت آهي ته جنون گروپ جي احتساب گاني (Accountability) ۾ پيپلز پارٽي جي گذريل حڪومت کي تمام گهڻو هِٽ ڪيو ويو هو. جنهن کي گهوڙن کي فائيو اسٽار هوٽلن ۾ ڊنر ڪندي ڏيکاريو ويو هو. هي ڪانسيپٽ Concept به پاڪستان جي کاٻي ڌر جو آهي. جنيد جمشيد جي مذهبي جنونيت هن کي پاڪستان جو باني پاپ سنگر به چون ٿا، گذريل ٻن ڏهاڪن کان وٺي ماڻهو هن کي ٻڌندا اچن پيا؛ هن ان وقت ڳائڻ شروع ڪيو جڏهن پاڪستان ۾ پاپ گلوڪارن جو تصور به نه هيو. اڄڪلهه هي سڀ ڪجهه تياڳي ويٺو آهي. سندس چوڻ آهي ته موسيقي ۾ ڪجهه نه آهي. ياد رکڻ گهرجي ته ڳائڻ هن پوءِ به نه ڇڏيو آهي، هي هن وقت به ڳائي رهيو آهي، پر هن ڳائڻ جو Mode تبديل ڪيو آهي، مشرف حڪومت اچڻ کانپوءِ جيڪا مذهبي جنونيت وڌي آهي، ان جو پهريون وهڪرو جنيد جمشيد آهي، دنيا لاءِ اهو پيغام ڪافي آهي ته پاڪستان جو باني پاپ اسٽار جنيد جمشيد هاڻي ڳائڻ ڇڏي ڏنو آهي. جڏهن ته پاڪستان جي فيشن ڊزائين انڊسٽري ۾ هن وقت مضبوط نالو جنيد جمشيد جو آهي. سندس فيشن ڊزائين ڪمپني JJ جي نالي سان پاڪستان جي هر وڏي شهر ۾ آهي. JJ جي نالي سان بوتيڪ آهن، جتي تازيون تازيون ورائٽيون توهان کي ملنديون، نه صرف اهو پر پاڪستان جي مهانگي ترين بوتيڪ آهن، حيدرآباد ۾ به توهان کي مهانگيون ۽ فيشن واريون ڊريسز JJ وٽ ملنديون. هن سموري بحث جو وچوڙ وڃي اهو نڪرندو ته رجعتيت نه صرف سياست ذريعي اسان مٿان حاوي ٿي رهي آهي، پر اها انقلاب مخالف، پراڻ پسند قدامت ۽ رجعتيت اسان مٿان موسيقي ۽ آرٽ ذريعي به حاوي ڪئي پئي وڃي. ان قسم جي لاڙن کي ان ئي طريقي سان منهن ڏيڻ جي ضرورت آهي. ضرورت آهي اهڙن نوجوانن جي، جيڪي موسيقيءَ جي هٿيارن سان ليس هجن، ۽ شعوري طور تي بالغ هجن، سيڪيولر ۽ لبرل هجن، ۽ اهڙي قسم جي موسيقيءَ ذريعي برين واشنگ کي ناڪاره بڻائن. |
